O Servizo Integral de Apoio ás Mulleres Coidadoras no Medio Rural, financiado pola Deputación da Coruña cunha subvención de 24.960,00 € e un coeficiente de financiamento do 0.80, desenvolveuse un ano máis co obxectivo de promover o empoderamento persoal e a activación social das mulleres coidadoras, excoidadoras e potenciais coidadoras nos municipios da provincia.
Ao longo deste ano 2025 foron atendidas 87 mulleres no punto de acollida e asesoramento, servizo que facilita un primeiro espazo de orientación individualizada sobre a súa situación, necesidades e prioridades. Así mesmo, 82 mulleres participaron na formación para o empoderamento persoal e a activación social, e 55 mulleres asistiron aos Espazos de Participación (ESPA), un recurso grupal deseñado para reforzar vínculos, fortalecer habilidades e fomentar o autocuidado desde dinámicas colaborativas.
Durante este ano estivemos presentes nos Concellos de Vimianzo, Betanzos, Cambre e Bergondo, así como nas parroquias de Lendo e Montemaior (A Laracha) e en Villestro (Santiago de Compostela), ampliando e facilitando a participación das mulleres residentes en contornos rurais .
Os obradoiros formativos impartidos semanalmente abordaron temáticas clave para o benestar das mulleres coidadoras, tales como o autocoidado, a xestión emocional, a xestión da culpa, a aprendizaxe de poñer límites ou relaxación, entre outras.
Dentro dos Espazos de Participación (ESPA) traballáronse dinámicas orientadas a reforzar o apoio mutuo, potenciar a rede social das mulleres e ofrecer un lugar seguro para compartir experiencias. Entre eles tivo lugar una sesión de Mindfulness para mellorar a concentración e reducir o estrés das coidadoras e a actividade “A arte do sentir. As cores do coidado”, no que se empregaron metodoloxías creativas para explorar e fomentar a expresión emocional favorecendo que as participantes identificaran recursos persoais para mellorar o seu benestar.
Desde Fundación Mujeres queremos agradecer a colaboración dos Servizos Sociais dos concellos participantes para levar a cabo a formación, así como a implicación de entidades coma ASPANAES que facilitaron a posta en marcha das actividades e a participación das mulleres da parroquia de Villestro.
O apoio destas entidades tanto públicas coma privadas resulta esencial para seguir fortalecendo un programa que busca recoñecer, acompañar e visibilizar o papel fundamental das mulleres coidadoras no medio rural.
Se estás interesada en participar e coñecer as actividades que se imparten dende Fundación Mujeres podes contactar con nós no teléfono 981 29 40 97 (ext. 6006).
