No marco do convenio nominativo co Concello de Bergondo para a cofinanciación do Servizo de Apoio Integral ás Mulleres Coidadoras no Medio Rural, financiado pola Deputación da Coruña, Fundación Mujeres levou a cabo actividades encamiñadas a mellorar a situación social, a calidade de vida e o pleno exercicio dos dereitos das mulleres.
O itinerario formativo desenvolveuse co obxectivo de contribuír ao fortalecemento persoal e social das mulleres coidadoras informais de persoas con dependencia no ámbito familiar. A través destas accións promoveuse un proceso de reflexión e análise sobre as situacións cotiás e particulares que afrontan, así como sobre o impacto que estas teñen no seu benestar integral. Este ano centrouse de maneira especial na xestión emocional das mulleres coidadoras, partindo do recoñecemento de que o benestar afectivo e psicolóxico é un elemento clave tanto para a súa saúde persoal como para a calidade do coidado que ofrecen.
O coidado pode xerar sobrecarga emocional, especialmente cando se realiza de forma continuada e sen apoio, polo que se buscaba dar voz ás emocións silenciadas, validar vivencias e fomentar o autocoidado. Para isto, leváronse a cabo sesións de xestión emocional para desenvolver estratexias para identificar, expresar e xestionar emocións de forma saudable, recoñecendo o impacto que o coidado ten na saúde física, mental e emocional. Á súa vez, practicouse mindfulness, que contribúe a reducir o estrés, a ansiedade e a sensación de sobrecarga emocional tan habitual nas mulleres que asumen tarefas de coidado prolongado, ofrecendo ferramentas prácticas para manter a conciencia emocional no día a día e favorecendo un estado de calma, presenza e equilibrio interior.
As participantes amosaron unha alta implicación e dispoñibilidade para contribuír de forma activa nos espazos grupais, algo que desde Fundación Mujeres se valora de maneira moi positiva, tendo en conta as dificultades que atravesan para acceder a este tipo de recursos.
Manifestamos, un ano máis, o agradecemento ao persoal técnico dos Servizos Sociais do Concello de Bergondo pola súa colaboración activa na difusión da actividade, así como pola súa disposición e apoio a través da cesión dos espazos municipais necesarios para o seu correcto desenvolvemento.
Para máis información sobre as actividades que Fundación Mujeres desenvolve en Galicia, estamos a disposición da cidadanía a través do teléfono 981 294 097 ou a través do correo electrónico galicia@fundacionmujeres.es
