Fundación Mujeres está a desenvolver itinerarios formativos dirixidos a mulleres coidadoras, excoidadoras e potenciais coidadoras nas localidades de Ourense e Pontevedra, en colaboración coas entidades Down Ourense e Down Pontevedra.
Esta iniciativa ten como obxectivo ofrecer un espazo seguro, participativo e transformador no que as mulleres poidan reflexionar sobre a súa experiencia como coidadoras, fortalecer a súa autoestima, mellorar o seu benestar emocional e adquirir ferramentas para o empoderamento persoal e social, favorecendo así a mellora da súa calidade de vida.
Os obradoiros abordan contidos fundamentais como a xestión emocional, a resolución de conflitos, o autocoidado, a asertividade e a autovaloración persoal, sempre dende unha perspectiva feminista que recoñece e pon en valor o papel esencial das mulleres no sostemento dos coidados e da vida.
Destácase especialmente a importancia de frear e dedicarse tempo, aprendendo a escoitar o corpo e as emocións como acto de autocoidado e de resistencia fronte ao ritmo acelerado e ás esixencias constantes do coidado das demais persoas.
As sesións realízanse de xeito presencial nas sedes de Down Ourense e Down Pontevedra, cunha excelente acollida por parte das mulleres participantes, que atopan nestes encontros un espazo de apoio mutuo, aprendizaxe compartida e recoñecemento.
Este programa está enmarcado no Servizo Integral de Apoio ás Mulleres Coidadoras (SAIC), financiado pola Consellería de Política Social e Igualdade da Xunta de Galicia. A través deste servizo, Fundación Mujeres promove a creación de redes de acompañamento, fortalecemento persoal e activación social das mulleres coidadoras, contribuíndo a construír unha sociedade máis xusta e coidadora.
Dende Fundación Mujeres queremos agradecer a implicación das participantes e a colaboración das entidades Down Ourense e Down Pontevedra na posta en marcha destes itinerarios formativos.
As mulleres interesadas en coñecer máis sobre este ou outros programas poden contactar con Fundación Mujeres a través do teléfono 981 29 40 97 ou do correo electrónico saicgalicia@fundacionmujeres.es
