Fundación Mujeres, a través do Servizo de Apoio Integral ás Mulleres Coidadoras no municipio da Coruña, financiado polo Concello de A Coruña, desenvolveu no primeiro semestre de ano numerosos talleres e espazos de participación dirixidos a mulleres que coidan ou coidaron de xeito non profesional no eido familiar a persoas con algún tipo de diversidade funcional.
Ó longo destes meses, leváronse a cabo 6 itinerarios entre os que destacan o do Centro Cívico de Monelos, Centro Cívico de Elviña, ademais dos realizados con entidades coma ACCEM, AGAFAN, e outras que traballan a prol das persoas con diversidade funcional, coma FEAFES.
Cabe destacar este ano tamén a labor das traballadoras sociais dos centros de saúde de Elviña, Adormideras, Monte Alto e Abente e Lago do Servicio Galego de Saúde na difusión do proxecto e na cesión do espazo para levar a cabo as formacións.
O total de beneficiarias formadas ata agora ascende a case 90 mulleres.
As temáticas abarcadas nos talleres partiron das necesidades das usuarias e foron adaptadas a cada grupo, estando relacionadas ca saúde integral e o desenvolvemento de hábitos para cultivala, partindo da premisa do autocoidado como pilar fundamental para coidar doutras persoas. Abordouse o fortalecemento da autoestima, a importancia da escoita activa, ferramentas para aprender a poñer límites e dicir que non sen sentirse culpables, a xestión dos conflitos, estratexias de regulación emocional e relaxación, entre outras.
En canto aos espazos de participación, agradecer ao Centro de Exposicións MOP, Art e Estudio, Mística Flora, Escola Galega de Saúde para a Cidadanía, Kiosko Alfonso e á Fundación Barrié a súa colaboración para o fomento da activación social e o empoderamento persoal das case 100 mulleres participantes a través destas actividades culturais e sanitarias totalmente gratuítas.
A satisfacción e o agradecemento por parte das participantes quedou reflectido no seu compromiso ao longo do proceso, aportando valor a tódalas sesións cas súas experiencias e coñecementos, poñendo de manifesto o seu interese e o seu desexo de continuar con estas actividades que favorecen a súa saúde e o seu benestar.
Se estás interesada en participar nos itinerarios do segundo semestre, podes contactar connosco a través do teléfono 981 29 40 97 (ext. 6006).
¡Agardámoste!
